ប្រធានសហភាពសហព័ន្ធអ្នកសារព័ត៌មានកម្ពុជា លោក ហ៊ុយ វណ្ណៈ មានជំនឿថា សមាគមសារព័ត៌មានចំនួន១៤ នៅកម្ពុជា នឹងរួមគ្នាធ្វើការងារបានច្រើនបន្ថែមទៀតសម្រាប់សង្គមជាតិ
(ភ្នំពេញ)៖ថ្លែងក្នុងពិធីចុះអនុស្សារណៈយោគយល់គ្នារវាងសមាគម និងសមាគនៅកម្ពុជា សរុបចំនួន១៤ នាថ្ងៃទី២៨ ខែកុម្ភៈ ឆ្នាំ២០២៣ សម្រាប់ជាមូលដ្ឋាន ត្រីវិស័យ និងជាក្រមប្រតិបត្តិរបស់សម្ព័ន្ធភាព ដោយបានឱ្យឈ្មោះកិច្ចសហការនេះថា «សម្ព័ន្ធសមាគមសារព័ត៌មានកម្ពុជា»នោះ លោក ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា បានលើកឡើងថា គំនិតផ្តួចផ្តើមឱ្យមានសម្ព័ន្ធភាពសមាគមសារព័ត៌មានកម្ពុជានេះ គឺធ្វើឡើងបន្ទាប់ពីជំនួបលើកទី៥ រវាងនាយករដ្ឋមន្ត្រីកម្ពុជា និងអ្នកសារព័ត៌មានកម្ពុជា នាថ្ងៃទី១៤ ខែមករា ឆ្នាំ២០២៣។ នេះគឺជាទំព័រថ្មីមួយនៅក្នុងប្រវត្តិសាស្ត្រវិស័យសារព័ត៌មាន និងការផ្សព្វផ្សាយនៅកម្ពុជា ដែលសមាគមសារព័ត៌មាន ចំនួន១៤ បានខិតខំប្រឹងប្រែងរហូតអាច រួមគ្នាជាធ្លុងមួយ ហើយឈានទៅចុះអនុស្សារណៈយោគយល់គ្នាបង្កើតបានជាសម្ព័ន្ធភាពដ៏ធំ មានចក្ខុវិស័យ និងសកម្មភាពការងារច្បាស់លាស់»។
ក្នុងនោះលោកមានជំនឿថា សមាគមសារព័ត៌មានចំនួន១៤ នៅកម្ពុជា នឹងរួមគ្នាធ្វើការងារបានច្រើនបន្ថែមទៀតសម្រាប់សង្គមជាតិ។ ក្រោយចុះអនុស្សារណៈយោគយល់គ្នានេះ ថ្នាក់ដឹកនាំនៃ សម្ព័ន្ធសមាគម សារព័ត៌មានកម្ពុជា នឹងស្នើសុំជួបសម្ដែងការគួរសម និងសុំអនុសាសន៍ដឹកនាំបន្ថែមពីរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ។ លោកក៏បានបើកចំហទទួលស្វាគមន៍សមាគមសារព័ត៌មាននានាបន្តទៀត មកចូលរួមសកម្មភាពការងារក្នុង «សម្ព័ន្ធសមាគមសារព័ត៌មានកម្ពុជា»។
សូមបញ្ជាក់ផងដែរថា សមាគមសារព័ត៌មានចំនួន១៤ ដែលបានចុះអនុស្សារណៈយោគយល់គ្នានោះរួមមាន សហភាពសហព័ន្ធអ្នកសារព័ត៌មានកម្ពុជា ,ក្លឹបអ្នកកាសែតឯករាជ្យ ,សមាគមសារព័ត៌មានអេឡេត្រូនិក ,សមាគមសេរីភាពសារព័ត៌មានកម្ពុជា ,សមាគមអ្នកសារព័ត៌មានកម្ពុជា-អាស៊ាន ,សមាគមអ្នកកាសែតខ្មែរសន្តិភាព ,សមាគមិត្តភាពអ្នកសារព័ត៌មានអាស៊ាន ,សមាគមសម្ព័ន្ធអ្នកសារព័ត៌មានសកលសន្តិភាព ,សមាគមអ្នកសារព័ត៌មានខ្មែរប្រជាធិបតេយ្យ ,សមាគមអភិវឌ្ឍន៍វិជ្ជាជីវៈអ្នកសារព័ត៌មានកម្ពុជា ,សមាគមអ្នកសារព័ត៌មានយុវជន ,សមាគមអ្នកសារព័ត៌មានឯករាជ្យជាតិកម្ពុជា ,សមាគមអ្នកសារព័ត៌មានអង្កេតការពិតនៅកម្ពុជា និងសមាគមសម្ព័ន្ធសារព័ត៌មានគេហទំព័រកម្ពុជា៕
